夢見“地震”，點算呀？
- Canis Lin
- 3月19日
- 讀畢需時 3 分鐘
2025年已不知不覺過了差不多一個季度，大家生活如何呢？
跟以往相比，這一季多聽到夢者分享發了“地震夢”、“海嘯夢”、甚至是“世界末日”的夢境。
通常他們第二句跟我說都是：“唔知係咪因為最近大家成日談論果本疑似預言的漫畫書，所以發呢d夢呢？！”
夢者的迷思：莫非是日有所思、夜有所夢？還是容格心理學所講的集體潛意識呢？莫非好多人都有相似的意念，所以入咗我個夢？
根據一位有40多年夢工作經驗及牧師Jeremy Taylor所講，夢是多意義性的 -- 即是一個夢境可以包含多個層面，包括反映個人層面（身體、心理、解決問題、和自己的關係、和別人的關係等等）、文化層面、靈性層面及集體潛意識層面。
我通常會鼓勵夢者先從個人層面去探索一下。
最近為一位夢者Edward（化名）探索他的“地震夢”，謝謝Edward願意讓我分享他從探索夢境後的領悟！為保護Edward私隱，我已將夢境適當地修改。
Edward分享：“我夢見地震呀！我同阿仔響屋企，突然間地震，成座樓傾斜咗，好驚呀！震完之後，發現大家無事喔！好神奇呀！成座樓傾斜咗，稔緊點樣落到地下，就醒咗啦！”
解夢通常我都會先問夢者夢中感覺，就算佢講個夢時已經講過，因為好多時夢者可能會有更多感覺浮現。
Edward: “而家稔稔下其實又唔係好驚咋喔！”；
我：“夢中屋企係幾多樓呢？”；
Edward：“18樓”；
我：“你阿仔今年幾多歲呢？”；
Edward：“19歲”；
從過去的解夢經驗，這部分似乎有d關係。不過我沒有直接問，想俾多d空間繼續探索一下先。
我：“2018年或者18年前、又或者同18相關的日子有沒有一些像是地震，令你驚的情況出現過呢？”
Edward：“Er。。。無喔！2018年？無喔！Er。。。18年前？我幾多歲呢？好似無喔！。。。好彩我間唔中會寫下日記（大事記），等我search 下先”；
觀察著Edward 努力在手機搜索，突然。。。
Edward毛管棟到不得了！“嘩！好神奇呀！一搵睇到我本“大事記”寫住“2018年8月18日。。。果日係阿仔做大手術日子！！！”唔怪得之覺得地震咁驚啦！我終於明白啦！嘩！我真係已經唔記得咗係幾時發生！”；
我都即時毛管棟！原來18係個年份，又係個日子！ “雖然你意識層面唔記得，但潛意識什麼也記得呢！至於點解已經事過境遷，仲會發呢個夢提你呢，可以留意一下你呢段時間有沒有相似的“驚”既感覺呢？”
Edward：“嘻嘻！我估都可能同阿仔有關！雖然佢都好似大個仔咁，但係我都有好多嘢唔放心！”；
我：“都明白家長可能會有此情況！都係一個學習過程，學習放心。。。和放手！要相信阿仔係有能力去處理佢自己的問題，如果唔係，佢內心可能會覺得你係否定佢，但又未必會表達俾你知！”
Edward：“係囉！真係好難放手啊！不過都要試下，如果唔係自己內心成日地震都好辛苦！”
我：“你願意試試都係好事啊！另外，你個夢可能都溫馨提示你要多d grounding，避免稔太多，因為夢中你“稔緊點樣落到地下”，避免稔太多（18樓層的高度可以象徵思想世界），而且你個夢地震完係無事，仲覺得好神奇添！可能潛意識想提你你的“稔太多”其實結果都係會無事既，避免“稔太多”啦！你覺得呢？”
Edward：“嘻嘻！我都係會成日胡思亂想，有好多擔心既人黎既！都係要改改佢！”
當我們可能會擔心自己的“地震夢”係對外在世界的預言時，我會鼓勵大家探索一下同自己內心世界相關的情況先。畢竟內在正向的轉變，也可能對外在產生正向的變化。與其過度擔心，不如做多d grounding （接地練習），令內心容易平靜安穩下來吧！
我都每日繼續努力練習～共勉之！
*如果您喜歡這篇文章的話，歡迎您like 及分享給有需要的人！謝謝！
** 如果您有朋友想學解夢的話，歡迎分享以下【解夢治療應用證書課程】俾朋友們，謝謝！
Comments